(မင်းပြား - စက်တင်ဘာ ၇ ရက်)
(၇၇) ကြိမ်မြောက် ဆရာတော်ဦးဥတ္တမနေ့အကြို စာပေဟောပြောပွဲတစ်ရပ်ကို ယနေ့ စက်တင်ဘာလ ၇ ရက်နေ့ ၊ ည ၇ နာရီခန့်လောက်က ရခိုင်ပြည်နယ် ၊ မင်းပြားမြို့ရှိ မြို့ရောနယ်ပါ ဓမ္မာရုံကြီး၌ ကျင်းပပြုလုပ်ခဲ့ကြောင်း သိရသည်။
အဆိုပါ စာပေဟောပြောပွဲသို့ မင်းပြားမှ စာပေကို စိတ်ပါဝင်စားသည့် လူကြီးလူငယ်များအပါအဝင် စာသင်ဝိုင်းမှ ကျောင်းသား၊သူများ စုစုပေါင်း (၄၀၀) ခန့်လောက် တက်ရောက်နားထောင်ခဲ့ကြောင်း သိရပြီး အဆိုပါ စာပေဟောပြောပွဲဖြစ်မြောက်ရေးအတွက် ဆရာတော်ဦးဥတ္တမနေ့ ကျင်းပရေးကော်မတီနှင့် စာသင်ဝိုင်းများက ဦးဆောင်ပူးပေါင်းစီစဉ်ခဲ့ခြင်း ဖြစ်ကြောင်း သိရသည်။
စာပေဟောပြောပွဲအစတွင် ဆရာဦးကျော်ဝင်းခိုင်မှ ဟောပြောပွဲကျင်းပရခြင်း၏ ရည်ရွယ်ချက်ကို အကျဉ်းချုပ် ရှင်းလင်းတင်ပြခဲ့ပြီး ၄င်းနောက်တွင် ဆရာတော်ပညာစာရက ``လေးစားထိုက်သော ဆရာတော် ဦးဥတ္တမ၏ စိတ်ဓာတ်´´ ခေါင်းစဉ်ဖြင့် လည်းကောင်း ၊ မင်းပြားမှ ရခိုင်စာရေးဆရာ သုတေသီ မင်းပြားမင်းသိန်းစံမှ `` ဇာတ်သိမ်းမကောင်းသော ဆရာတော် ဦးဥတ္တမ´´ ခေါင်းစဉ်ဖြင့် လည်းကောင်း ၊ နာမည်ကြီး ကဗျာဆရာစစ်တွေ-ညိုသန့်မှ ``ကျေးဇူး အနန္တ ဆရာတော် ဦးဥတ္တမ´´ ဖြင့်လည်းကောင်း အသီးသီး ဟောပြောခဲ့ကြကြောင်း သိရသည်။
လာမည့် စက်တင်ဘာလ ၉ ရက် ၊ ဆရာတော်ဦးဥတ္တမနေ့တွင်ကား မင်းပြားရှိ ဆရာတော်ဦးဥတ္တမရုပ်ထုအား လွမ်းသူ့ပန်းခွေများ ချအပ်သွားမည်ဖြစ်ကြောင်း သိရသည်။
မောင်ကာကြီး (လေးမြို့)
