(မင်းပြား - ဇွန် ၁၁ )
၂၀၁၆ မင်းပြားမြို့နယ်တက္ကသိုလ်ဝင်တန်းအောင်ချက်သည် ရခိုင်ပြည်နယ်တွင် ဒုတိယအောင်ချက်အကောင်းဆုံးမြို့နယ်အဖြစ် ရပ်တည်နိုင်ခဲ့ကြောင်း သိရသည်။
ယခုနှစ် တက္ကသိုလ်ဝင်တန်းစာမေးပွဲအောင်စာရင်းများကို ယနေ့ ဇွန်လ ၁၁ ရက်နေ့ ၊ နံနက် (၆) နာရီက မြန်မာနိုင်ငံတစ်ဝှမ်းလုံးတွင် တပြေးညီထုတ်ပြန်ကြေငြာခဲ့ရာ မင်းပြားမြို့နယ်တွင် ၅-ဘာသာ ဂုဏ်ထူးရှင် (၂)ဦး၊ ၄-ဘာသာ ဂုဏ်ထူးရှင် (၄)ဦး၊ ၃-ဘာသာ ဂုဏ်ထူးရှင် (၇)ဦး၊ ၂-ဘာသာ ဂုဏ်ထူးရှင် (၅)ဦး၊ ၁-ဘာသာ ဂုဏ်ထူးရှင် (၄၂)ဦး၊ စုစုပေါင်းဂုဏ်ထူးရ ကျောင်းသား/သူ (၆၀)ဦးရှိကြောင်းသိရပြီး မင်းပြားမြို့နယ် ၂၀၁၆ ခုနှစ် တက္ကသိုလ်ဝင်တန်းအောင်ချက်မှာ (၂၈.၃၄) ရာခိုင်နှုန်းရှိခဲ့ကြောင်း မင်းပြား - သတင်း၏ ဖော်ပြချက်တစ်ရပ်အရ သိရသည်။
ဘာသာရပ်အလိုက် ဂုဏ်ထူးရရှိသူများမှာ မြန်မာစာဂုဏ်ထူး (၄)ဦး၊ အင်္ဂလိပ်စာ ဂုဏ်ထူး (၄)ဦး၊ သင်္ချာဂုဏ်ထူး (၅)ဦး၊ ဓာတုဗေဒဂုဏ်ထူး (၁၆)ဦး၊ ရူပဗေဒဂုဏ်ထူး (၂၂)ဦး၊ ဇီဝဗေဒဂုဏ်ထူး (၂၂)ဦး၊ သမိုင်းဂုဏ်ထူး (၁)ဦးနှင့် ဘောဂဗေဒဂုဏ်ထူး (၂၅)ဦး ရရှိခဲ့ကြောင်း မင်းပြား - သတင်းတွင် ဖော်ပြထားသည်ကို တွေ့ရသည်။
မင်းပြားမြို့နယ်သည် ၂၀၁၂ ခုနှစ်တွင် (၃၇.၂၁)%၊ ၂၀၁၃ ခုနှစ်တွင် (၂၈.၁၇)%၊ ၂၀၁၄ ခုနှစ်တွင် (၂၄.၂၁)%၊ ၂၀၁၅ ခုနှစ်တွင် (၃၂.၂၂)% အသီးသီးဖြင့် ရခိုင်တစ်ပြည်လုံး၌ တက္ကသိုလ်ဝင်စာမေးပွဲတွင် ၂၀၁၂ ခုနှစ်မှ ၂၀၁၅ ခုနှစ်အထိ အောင်ချက်အကောင်းဆုံး မြို့နယ်အဖြစ် (၄)နှစ်ဆက်တိုက် ရပ်တည်နိုင်ခဲ့သော မြို့တစ်မြို့ဖြစ်ကြောင်း သိရပြီး ယခု ၂၀၁၆ ခုနှစ်တွင် ပေါက်တောမြို့နယ်က (၃၁.၈၇) ရာခိုင်နှုန်းဖြင့် ရခိုင်ပြည်နယ်တွင် အောင်ချက်အကောင်းဆုံးမြို့နယ်အဖြစ် ရပ်တည်နိုင်ခဲ့ကြောင်း သိရသည်။
မောင်ကာကြီး (လေးမြို့)
ကိုးကား >>> မင်းပြား - သတင်း