(မင်းပြား - ဇွန်လ ၂ )
ရခိုင်ပြည်နယ် ၊ မင်းပြားမြို့ ၊ ကင်းဆိပ်မြို့ထွက်ဂိတ်အနီးရှိ အဝေးပြေးကားဝင်းအား မော်တော်ယာဉ်လိုင်းများ များပြားလာမှုနှင့် ယာဉ်ရပ်နားရန် နေရာကြပ်တည်းလာမှု တို့ကြောင့် တိုးချဲ့ ရန် (သို့) ပြောင်းရွေ့ ရန် လိုအပ်နေကြောင်း သိရသည်။
ယခုအသုံးပြုနေသော မင်းပြားအဝေးပြေးကားဝင်းတွင်း အဝေးပြေးမော်တော်ယာဉ်လိုင်းများ တိုးချဲ့ဖွင့်လှစ်လာမှု ကြောင့် ဆိုက်ရောက်ယာဉ်များ ရပ်နားရန်နှင့် ကုန်တင်၊ ကုန်ချယာဉ်များ ရပ်နားရန် နေရာအခက်အခဲများစွာ ဖြစ်နေရကြောင်း နန်းတော်ဝင်ဂိတ်မှ ဂိတ်မှူး ကိုညီညီက ဆိုသည်။
ယခုအသုံးပြုနေသော အဝေးပြေးကားဂိတ်ကို ၂၀၀၃ - နောက်ပိုင်းကစတင်ကာ အသုံးပြုရပ်နားခဲ့ခြင်းဖြစ်ပြီး အကျယ်အဝန်းမှာ ၂ ဧကခန့်လောက်ရှိမည်ဟု ယူဆခန့်မှန်းရကြောင်း သိရသည်။
အစတွင် မော်တော်ယာဉ်လိုင်း ၄ ၊ ၅ ၊ ၆ ခုသာ ရှိခဲ့ရာမှ ယခုအခါ မော်တော်ယာဉ်လိုင်းပေါင်း ၂၀ ကျော်ခန့်လောက်ထိ ရှိလာခဲ့ကာ ယာဉ်ရပ်နားရန် နေရာခက်ခဲလာမှုနှင့် ယာဉ်ကြပ်တည်းမှုတို့ ဖြစ်နေကြောင်း ကိုညီညီက ဆိုသည်။
အဆိုပါ ယာဉ်ကြပ်တည်းမှုနှင့် ယာဉ်ရပ်နားရန် နေရာခက်ခဲမှုတို့သည် ယာဉ်အန္တရာယ်ဖြစ်ပွားမည်ကို စိုးရိမ်ရပြီး မြို့ရွာ ဖွံ့ဖြိုးလာသည်နှင့်အမျှ ခေတ်နှင့်အညီ တိုးချဲ့ခြင်း (သို့) အခြားနေရာပိုကျယ်သော နေရာတစ်ခုသို့ ပြောင်းရွေ့ရန် လိုအပ်လာနေပြီဖြစ်ကြောင်း သိရသည်။
မောင်ကာကြီး (လေးမြို့)
ဓာတ်ပုံ - ညီညီ (နန်းတော်ဝင်)